Quba rayonunun İkinci Nügədi kəndində yerləşən Oktay Məmmədov adına 1 nömrəli tam orta məktəbdə 21 Sentyabr – Beynəlxalq Sülh Günü ilə bağlı tədbir keçirilib.
Məktəbdən bildirilib ki, tədbirdə şagirdlər sülh, dostluq, həmrəylik və qarşılıqlı hörmətin əhəmiyyəti barədə fikirlərini bölüşüblər.
Şagirdlər məktəbin həyətində sülh və birlik mövzusunda müxtəlif görüntülər yaradaraq həmin günün mahiyyətini fotolarla əks etdiriblər.
Qeyd edək ki, hər il sentyabrın 21-də beynəlxalq ictimaiyyət Beynəlxalq Sülh Gününü qeyd edir.
Birləşmiş Millətlər Təşkilatının Baş Assambleyası bu günü həm milli, həm də beynəlxalq səviyyədə bütün ölkələr və xalqlar arasında sülh ideallarının möhkəmləndirilməsi günü elan edib.
1981-ci ildə Baş Assambleya 36/67 saylı qətnaməsi ilə Sülh Gününü elan edib və onun sentyabr ayının üçüncü çərşənbə axşamı qeyd olunmasını müəyyənləşdirib. 20 il sonra – 2001-ci ildə isə Baş Assambleya yekdilliklə 55/282 saylı qətnaməni qəbul edərək 2002-ci ildən etibarən Beynəlxalq Sülh Gününün hər il sentyabrın 21-də ümumi atəşkəs və zorakılıqdan imtina günü kimi qeyd olunmasına qərar verib.
