Quba–Bakı magistralında sürücülər təhlükəli vəziyyətin yarandığını bildiriblər.
Onların Shimal.News-a bildirdiyinə görə, Qubanın Alekseyevka kəndi ərazisində 1.6.4 nömrəli yol nişanı təxminən 1 aya yaxındır ki, kənardakı otluğa aşaraq hələ ora da qalıb.
Həmin nişan qarşıdan əsas yola (soldan) birləşən ikinci dərəcəli yol ayrıcını göstərir. Bakı şəhəri istiqamətində hərəkət edən sürücülər qarşıda yol ayrıcının olması barədə əvvəlcədən məlumatlandırılır.
Hazırda sola dönmək istəyən sürücülər, son anda dönmə işığını yandıraraq manevr edirlər. Hətta bəzən yolu keçərək qarşıdan geri dönməyə məcbur qalırlar. Bu isə arxadan gələn avtomobillər üçün xüsusilə havanın qaranlıq vaxtında qəfil toqquşma təhlükəsini yaradır.
Sakinlərin sözlərinə görə, sözügedən yol ayrıcında tez-tez qəzalar baş verir. Bu səbəbdən aidiyyəti qurumlardan təhlükəli vəziyyətin aradan qaldırılmasını və yol nişanının qısa müddətdə bərpa edilməsini xahiş edirlər.
