Qax rayonunda "Kürmükoba" bayramı qeyd olunub – yüzlərlə insan məbədi ziyarət edib.
Shimal.News xəbər verir ki, ildə iki dəfə keçirilən mərasimdə həm müsəlman, həm də xristian sakinlər Kürmük məbədinə axışıb. Qədim ənənələrə bağlı olan mərasim bu gün də öz ibtidai köklərini qoruyur.
Bayram iştirakçıları qədim ayinlər yerinə yetirir: ağaclara əski bağlayır, qayaların üzərində şamlar yandırır, niyyət edir və məbədin həyətində heyvan qurbanı kəsirlər. Bu mərasimdə həm İslam, həm də xristianlıq ünsürlərinin yanaşı görünməsi onun sinkretik xarakter daşıdığını sübut edir.
"Kürmükoba" əslində təbiət ayini olub və may və noyabr aylarında — Kürmük çayının daşdığı dövrlərdə keçirilir. Bayramın məhz Kürmük çayının adı ilə bağlı olması da bu ənənəni təsdiqləyir.
Dini mənsubiyyətindən asılı olmayaraq, bölgənin müxtəlif kəndlərindən yüzlərlə sakin gün ərzində piyada şəkildə məbədə qalxaraq ziyarətlərini həyata keçiriblər.
