Oğuz rayonunun Kərimli kəndində Şeyx Hacı Mirsadiq əfəndinin məzarının - "Çərşənbəbaba" ziyarətgahının saxtalaşdırılmasına cəhd edildiyi iddia olunur. Belə ki, mövcud məzarın yaxınlığında əlavə bir qəbir qazılaraq üzərinə saxta başdaşı qoyulub. Ziyarətə gələn şəxslərə isə əsas məzar əvəzinə sonradan yaradılmış bu qəbrin ziyarət edilməsi tövsiyə olunur.
Məsələ ilə bağlı Shimal.News-a Kərimli kənd bələdiyyəsinin sədri Vüqar İbrahimov məlumat verib. Onun sözlərinə görə, sosial şəbəkələrdə yayılan görüntülərdə əks olunan pir ziyarətgah ərazisində sonradan, müvafiq icazələr olmadan inşa edilib.
Vüqar İbrahimov bildirib ki, Bələdiyyə tərəfindən "Çərşənbəbaba" ziyarətgahında qanunsuz pir tikintisi ilə bağlı Kərimli kənd Dini İcmasının sədri Əmir Kərimova həm şifahi, həm də rəsmi qaydada xəbərdarlıq edilib. Lakin xəbərdarlıqlara baxmayaraq, 2023-cü ildən etibarən pirin yenidən inşa olunduğu müəyyən edilib.
Bələdiyyə sədri əlavə edib ki, məsələ ilə bağlı aidiyyəti dövlət qurumlarına məlumat verilib və qanunvericiliyə uyğun olaraq müvafiq cərimələr tətbiq olunub. Hazırda isə Şeyx Hacı Mirsadiq əfəndinin nəvələri tərəfindən məsələ ilə əlaqədar Oğuz Rayon Məhkəməsinə rəsmi müraciət edilib.
