Qəbələ ilin bütün fəsillərində özünəməxsus gözəlliyi ilə seçilən və minlərlə yerli, eləcə də xarici turistin üz tutduğu turizm məkanlarından biridir. Yay aylarında isə rayonun lavanda sahələri ziyarətçilərin ən çox maraq göstərdiyi ünvanlar sırasındadır.
Çuxur Qəbələ kəndində yerləşən "Essenso Garden" aqroturizm mərkəzi bu baxımdan xüsusi diqqət çəkir. 2018-ci ildən fəaliyyət göstərən və 30 hektar ərazini əhatə edən mərkəzdə lavanda və digər aromatik bitkilər becərilir, həmçinin təbii lavanda yağı və müxtəlif ekoloji məhsullar istehsal olunur.
May ayının ortalarından oktyabrın sonunadək davam edən mövsümdə lavanda sahələri bənövşəyi rəngə bürünərək turistlərə möhtəşəm mənzərə təqdim edir. Ərazidə yaradılan dekorativ və tematik fotozonalar da ziyarətçilərin böyük marağına səbəb olur.
Xüsusilə gün batımı zamanı günəş şüalarının lavanda tarlaları ilə yaratdığı rəng harmoniyası əraziyə xüsusi gözəllik bəxş edir. Bu mənzərəni izləyən turistlər təbiətin bu füsunkar guşəsinin onlarda unudulmaz təəssüratlar yaratdığını bildirirlər.
Lavanda ətri ilə əhatələnən bu aqroturizm məkanı həm təbiətsevərlər, həm də foto həvəskarları üçün Qəbələnin ən cəlbedici istirahət ünvanlarından biri hesab olunur.
Mənbə: AZƏRTAC
