Bu gün Vətən müharibəsi şəhidi Rəşid Qəzənfər oğlu Nəsrullayevin doğum günüdür.
Rəşid Nəsrullayev 11 iyul 1993-cü ildə Qəbələ rayonunun Nic qəsəbəsində anadan olub. 1999–2010-cu illərdə Nic qəsəbə 4 nömrəli tam orta məktəbdə təhsil alıb. 2011-ci ildə müddətli həqiqi hərbi xidmətə yollanaraq Azərbaycan Silahlı Qüvvələrinin sıralarında Vətənə xidmət edib və 2013-cü ildə ehtiyata buraxılıb.
2020-ci ilin iyul ayında Tovuz döyüşlərindən sonra elan olunan səfərbərlik zamanı Rəşid Nəsrullayev yenidən Vətənin müdafiəsinə qalxaraq hərbi təlimlərə cəlb olunub. Vətən müharibəsi başlayan ilk gündən könüllü atıcı kimi döyüşlərə qatılan Rəşid Suqovuşan istiqamətində gedən ağır döyüşlərdə böyük igidlik nümayiş etdirib.
O, 2020-ci il noyabrın 3-də Tərtər rayonunun Suqovuşan qəsəbəsi istiqamətində döyüş tapşırığını yerinə yetirərkən qəhrəmancasına şəhid olub.
Şəhid Rəşid Nəsrullayev göstərdiyi şücaətə görə Azərbaycan Prezidenti İlham Əliyevin sərəncamları ilə ölümündən sonra "Vətən uğrunda", "Laçının azad olunmasına görə", "Suqovuşanın azad olunmasına görə" medalları, həmçinin 3-cü dərəcəli "Vətənə xidmətə görə" ordeni ilə təltif edilib.
Qəbələnin Nic qəsəbəsindən olan igid Vətən oğlu Rəşid Nəsrullayev öz şərəfli həyatı və qəhrəmanlığı ilə xalqımızın yaddaşında əbədi yaşayacaq.
Allah bütün şəhidlərimizə rəhmət eləsin, ruhları şad olsun!
