Qax rayonunun Sarıbaş kəndi Böyük Qafqazın cənub ətəklərində, dəniz səviyyəsindən 1800 metrdən yüksəklikdə yerləşir. Qədim yaşayış məskəni əsrlərdir dağların qoynunda özünəməxsus həyat tərzini qoruyub saxlayır.
Shimal.News məlumat verir ki, tarixi XIV–XV əsrlərə gedib çıxan Sarıbaş əsasən saxurların yaşadığı kənd kimi tanınır. Yaşayış məntəqəsi əsrlər boyu İlisu sultanlığının mühüm strateji və müdafiə məntəqələrindən biri olub.
Sərt dağ relyefi və iqlim kənd sakinlərinin məişətinə, tikinti üslubuna və təsərrüfat fəaliyyətinə də təsir göstərib. Çay daşlarından inşa edilən və dağın yamacına uyğun pilləli şəkildə yerləşən evlər Sarıbaşın tarixi görünüşünü bu günədək qoruyur.
Dar keçidlər, daş divarlar və təbii relyeflə birləşən tikililər kəndə fərqli memarlıq siması bəxş edir.
Sarıbaşda ənənəvi məşğuliyyətlər arasında heyvandarlıq, yun toxuculuğu və xalçaçılıq xüsusi yer tutur. Bu sənətlər kənd sakinlərinin yalnız təsərrüfat fəaliyyəti deyil, həm də nəsildən-nəslə ötürülən mədəni irsinin bir hissəsidir.
