Yazın əvvəlindən yağan güclü leysanlar Qax rayonunda sel və daşqınlara səbəb olub. Xüsusilə Kürmük çayında suyun səviyyəsinin kəskin artması bir sıra yaşayış məntəqələrində təhlükə yaradıb.
Shimal.News xəbər verir ki, ən riskli ərazilərdən biri Əlibəyli kəndi hesab olunur. Burada selin qarşısını almaq üçün ağır texnika cəlb edilib və məcratənzimləmə işləri aparılır. Mütəxəssislər bildirirlər ki, görülən qabaqlayıcı tədbirlər sayəsində ciddi fəsadların qarşısı alınıb.
Sel suları Qax şəhərini içməli su ilə təmin edən plastik boru xəttinin bir hissəsini də üzə çıxarıb. Aidiyyəti qurumlar əraziyə müdaxilə edərək xəttin təhlükəli hissəsini yenidən qum-çınqıl qatı ilə örtüblər.
Yağıntılar rayonun suvarma sisteminə də təsirsiz ötüşməyib. Tasmalı kəndi ərazisindən keçən suvarma kanalında lillənmə və daşma halları qeydə alınıb. Hazırda kanalın təmizlənməsi istiqamətində işlər davam etdirilir.
Qax Su Meliorasiya Sistemlərinin İstismarı İdarəsinin məlumatına görə, rayon üzrə əsas və təsərrüfatdaxili kanalların təxminən 40 faizində lillənmə müşahidə olunub. Sel təhlükəsi ilə əlaqədar çay sahillərində və kanallarda növbəli rejimdə nəzarət və təmizləmə işləri davam etdirilir. Hazırkı vəziyyətdə görülən tədbirlər nəticəsində yaşayış məntəqələrində ciddi dağıntı qeydə alınmayıb.
