May ayından qarğıdalı sahələrinin sığortası başlanıb və hazırda davam etməkdədir. Məhsulu vaxtında sığortalamaq onu daha çox riskdən, o cümlədən may ayında baş verən leysan yağışlardan qorumağa imkan verir.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən bildirilib ki, qarğıdalı təbiət hadisələrinə qarşı həssas bitkidir - xüsusilə dolu, sel-subasma, fırtına, leysan yağışları və üçüncü şəxslərin hərəkətləri kimi hadisələr bu əkinlərə zərər vurur. Aqrar sığorta mexanizmi isə bu vəziyyətdə fermerlərin gəlirlərini qorumağa imkan verir.
Aqrar sığorta haqqının 50 faizi dövlət tərəfindən ödənildiyinə görə, fermerlər qarğıdalı sahələrini olduqca sərfəli şərtlərlə sığortalaya bilərlər. Qeyd edək ki, qarğıdalının çoxsaylı risklərdən sığortalanması Şəki-Zaqatala bölgəsində 58 manata başa gələcək.
Qarğıdalı aqrar sığorta üzrə ən çox zərər ödənişi edilən bitkilərdəndir. Aqrar Sığorta Fondu (ASF) qarğıdalı sahələri üzrə fermer və təsərrüfatlara indiyədək 777 min manat ödənişlər həyata keçirib və bu ödənişlər hər gün artmaqdadır. Qarğıdalı sahələri üzrə ödənişlərin əsas hissəsi Balakən, və Ağsu rayonlarında həyata keçirilib.
Aqrar sığorta məhsulları, əkinlərin və heyvanların sığortalanması şərtləri, eləcə də sığorta haqları barədə ətraflı məlumatı ASF-nin rəsmi internet səhifəsindən (asf.gov.az), həmçinin 1651 Çağrı Mərkəzinə müraciət etməklə almaq mümkündür.
