Prezident İlham Əliyev Ümumdünya Şəhərsalma Forumunun 13-cü Sessiyasının (WUF13) açılış mərasimində çıxışı zamanı Azərbaycanın qədim şəhərlərinin və tarixi abidələrinin ölkənin zəngin mədəni irsinin mühüm hissəsi olduğunu bildirib.
Shimal.News xəbər verir ki, dövlət başçısı çıxışında yalnız Bakı deyil, ölkənin Şimal bölgəsində yerləşən bir sıra qədim yaşayış məntəqələri və memarlıq nümunələrini də xüsusi vurğulayıb.
Qeyd edilib ki, vaxtilə Şirvanşahlar dövlətinin paytaxtı olmuş Şamaxı şəhərində yerləşən və 743-cü ildə inşa edilən qədim məscid dünyanın ən qədim məscidlərindən biri hesab olunur.
Dövlət başçısı həmçinin Qəbələ və Şəki şəhərlərində yerləşən qədim abidələrdən danışıb, Şəki yaxınlığındakı Kiş kilsəsinin dünyanın ən qədim kilsələrindən biri ola biləcəyini diqqətə çatdırıb.
İlham Əliyev qədim mühəndislik nümunəsi kimi Lahıc qəsəbəsini də xüsusi qeyd edib:
"Əcdadlarımızın istedadını nümayiş etdirən digər bir misal Lahıc kəndidir. On beş əsr bundan əvvəl kənd yaradılanda insanlar bu gün də işləyən kanalizasiya sistemini və su xəttini çəkmişlər".
