Şabran rayonunda Şah İsmayıl Xətai küçəsinin kəsişməsində yaşayan sakinlər uzun müddətdir yol problemindən əziyyət çəkdiklərini bildirirlər.
Shimal.News xəbər verir ki, sakinlərin sözlərinə görə, küçənin bərbad vəziyyəti ilə bağlı edilən müraciətlərə baxılmır.
Qeyd olunur ki, qış aylarında yağan yağış nəticəsində küçə tamamilə palçığa qərq olur və hərəkət etmək demək olar ki, mümkünsüz hala düşür. Bu səbəbdən uşaqlar məktəbə getməkdə, yaşlı sakinlər isə evdən çıxmaqda ciddi çətinliklərlə üzləşirlər.
Yay aylarında isə vəziyyət fərqli olsa da, eyni dərəcədə narahatlıq yaradır. Torpaq yol quruyaraq qalın toz qatına çevrilir və avtomobillərin hərəkəti zamanı ətrafı toz-duman bürüyür. Nəticədə evlərin pəncərəsini açmaq mümkün olmur, həyətlər və yaşayış evləri tozla dolur.
Sakinlərin sözlərinə görə, bu vəziyyət xüsusilə azyaşlı uşaqlar və yaşlı insanlar üçün sağlamlıq baxımından ciddi narahatlıq yaradır.
Küçə sakinlərindən biri, İkinci Qarabağ müharibəsi iştirakçısı və Vətən müharibəsi veteranı da problemin uzun müddətdir davam etdiyini bildirib.
Vətəndaşlar aidiyyəti qurumlardan küçənin asfaltlanmasını və ya əsaslı şəkildə təmir olunmasını xahiş edirlər.
