Uzun illərdir təmir olunmayan Zərrab kəndinin yolu yararsız vəziyyətə düşüb. Payız və qış aylarında problem daha qabarıq şəkildə özünü göstərir.
Bu barədə Shimal.News-a kənd sakinləri məlumat veriblər.
Sakinlərin sözlərinə görə, 30 ildən artıqdır ki, döymədikləri qapı qalmayıb. Uzun illərdir istifadə etdikləri yol zaman keçdikcə aşınıb və böyük bir hissəsində irili-xırdalı çalalar əmələ gəlib. Bu yoldan Zərrab kəndinin 400 nəfərdən artıq sakini istifadə edir. Yol sonuncu dəfə 90-cı illərdə asfalt örtüyü ilə üzlənib. Kənd yolu Kərimli-Oğuz-Şəki avtomobil yolunun sağ və sol sahilində yerləşir. Əsas yol olan Kərimli-Oğuz-Şəki avtomobil magistralı yeni təmir olunub. Ancaq nədənsə sakinlərin şikayət etdiyi kənd yolu diqqətdən kənarda qalıb.
Kənd sakinləri bildiriblər ki, aidiyyəti qurumlar tərəfindən hər dəfə yolun yaxın zamanlarda təmiri ilə bağlı söz verilsə də, bu sözə hələ də əməl olunmayıb.
