Oğuz rayonunun Muxas kəndində yerləşən tarixi binanın baxımsız vəziyyətdə olması vətəndaşlarda narahatlıq doğurur.
Bu barədə Shimal.News-a danışan sakinlər bildiriblər ki, kəndin şimalında, Daşağıl keçidi qarşısında yerləşən Muxas qülləsində indiyədək heç bir təmir-bərpa işləri aparılmayıb.
Bildirilib ki, orta əsrlərə aid olan abidə vaxtilə gözətçi məntəqəsi kimi istifadə olunub. O, ərazinin yadelli basqınlardan qorunmasında mühüm rol oynayıb. Tarixi mənbələrə görə, düşmən hücumları ilk olaraq bu nöqtədən müşahidə edilərək əhaliyə xəbər verilib.
Sakinlər qeyd edirlər ki, son 30-35 il ərzində qüllənin bəzi hissələri dağılıb, divarlarında çatlar əmələ gəlib. Üçmərtəbəli tikilinin birinci və ikinci mərtəbələri nisbətən yaxşı vəziyyətdə qalsa da, üçüncü mərtəbənin yuxarı hissəsi uçaraq yararsız hala düşüb.
Yerli əhali tarixi abidənin qorunması və bərpası üçün aidiyyəti qurumların tədbir görməsini zəruri hesab edir.
