26 İyun – Azərbaycan Respublikasının Silahlı Qüvvələri Günü münasibətilə Oğuz rayonunda həvəskarlar arasında qol güləşi turniri təşkil olunub.
Shimal.News xəbər verir ki, Şəki-Zaqatala Regional Gənclər və İdman İdarəsinin Oğuz rayonu üzrə gənclər və idman sektorunun təşkilatçılığı ilə keçirilən yarış Oğuz şəhərindəki Veteranlar Parkında baş tutub.
Turnirin məqsədi gənclər arasında sağlam həyat tərzinin təbliği, fiziki hazırlığın artırılması, idmana marağın gücləndirilməsi və Silahlı Qüvvələr Gününün qeyd olunması olub.
Yarış müxtəlif çəki dərəcələri üzrə keçirilib və hakimliyi Şəki Azadsport Regional Qol Güləşi Klubu həyata keçirib. Gərgin idman mübarizəsi şəraitində keçən turnirdə iştirakçılar birincilik uğrunda mübarizə aparıblar.
Sonda hər çəki dərəcəsi üzrə qaliblər müəyyənləşdirilərək Şəki-Zaqatala Regional Gənclər və İdman İdarəsinin Oğuz rayonu üzrə gənclər və idman sektoru tərəfindən medal, diplom və hədiyyələrlə təltif olunublar.
Tədbirin gənclərin asudə vaxtının səmərəli təşkili və idmanın kütləviliyinin artırılması baxımından əhəmiyyətli olduğu vurğulanıb.
