Azərbaycan fındıq istehsalına görə dünyada ilk sıralarda yer alır. Ölkənin əsas fındıqçılıq bölgələrindən olan Şəki-Zaqatala iqtisadi rayonunda bu il bağlarda məhsul bol olsa da, fermerlər satış qiymətlərindən narazıdır.
Hazırda Oğuzda fındığın aktiv yığım mövsümüdür. Rayonda 4375 hektar fındıq bağı var və bunun 2300 hektarı bar verən sahələrdir.
Fermerlərin sözlərinə görə, bu il məhsuldarlıq ötən illə müqayisədə yüksəkdir, lakin qiymətlər kəskin aşağı düşüb.
Padar kənd sakini Tamella Məmmədova bildirib ki, bol məhsula baxmayaraq, qabıqlı fındığın kiloqramını 3 manata belə satmaq çətindir.
20 hektara yaxın fındıq bağı olan fermer Müşfiq Dadaşov isə qeyd edib ki, ötən il qabıqlı fındığın kiloqramı 6-8 manata satıldığı halda, hazırda qiymət 2,5-3 manat arasında dəyişir. Onun sözlərinə görə, bir hektar bağa il ərzində 700-800 manat aqrotexniki qulluq xərci çəkilir. Bundan əlavə, məhsulun yığılması üçün hər kiloqrama 40 qəpik əməkhaqqı ödənilir.
Oğuz bazarında isə hazırda qərzəkli fındıq 3,5-4 manat, qərzəksiz fındıq 11-13 manat arasında təklif olunur.
Oğuz Rayon Dövlət Aqrar İnkişaf Mərkəzinin əməkdaşı Azər Vəliyev də mövcud qiymətlərin fermerləri qane etmədiyini bildirib. Onun sözlərinə görə, qeyri-sabit hava şəraiti təsərrüfatlara əlavə çətinlik yaradıb və məhsulun yetişdirilməsi üçün çəkilən xərclər artıb.
A.Vəliyev qeyd edib ki, ötən il Oğuzda 1500 tondan çox fındıq istehsal olunub. Bu il isə məhsulun daha bol olduğu bildirilir.
İqtisadçı-ekspert Xalid Kərimli qiymətlərin dünya bazarındakı vəziyyətlə əlaqəli olduğunu deyib. Onun sözlərinə görə, ötən il Türkiyədə quraqlıq səbəbindən dünya bazarında fındığın qiyməti yüksəlib. Bu il isə həm Türkiyədə, həm də Azərbaycanda məhsulun bol olması qiymətlərə təsir göstərib.
Ekspert hesab edir ki, qarşıdakı aylarda ixracın və satışların genişlənməsi ilə qiymətlərdə sabitləşmə baş verə bilər.
