Oğuz rayonunun Sincan kəndində təxminən 3 kilometr uzunluğunda yol yararsız vəziyyətə düşüb.
Kənd sakinlərinin Shimal.News-a verdiyi məlumata görə, mövcud vəziyyət gündəlik hərəkəti ciddi şəkildə çətinləşdirir. Xüsusilə yolun ən keçilməz hissəsi Tural Məmmədov küçəsində müşahidə olunur.
Sakinlər bildirirlər ki, qış aylarında küçənin girişindən başlayaraq kənddaxili yollar tamamilə palçıqla örtülür. Nəticədə yolda iri gölməçələr yaranır ki, bu da həm piyadaların, həm də nəqliyyat vasitələrinin hərəkətini mümkünsüz hala gətirir.
"Yağış yağan kimi küçədən keçmək olmur. Məktəbə gedən uşaqlar, yaşlı insanlar böyük çətinlik çəkirlər", – deyə kənd sakinləri bildiriblər.
Sakinlər aidiyyəti qurumlardan yolun təmir edilərək normal vəziyyətə salınmasını xahiş edirlər.
