Oğuz rayonunda son iki gündür axşam saatlarında marketlərdə çörək çatışmazlığı müşahidə olunur.
Shimal.News-a danışan rayon sakinlərinin sözlərinə görə, problem Oğuz şəhəri ilə yanaşı, rayonun iri yaşayış məntəqələrindən olan Kərimli və Padar kəndlərindəki böyük marketlərdə də müşahidə edilir. Bildirilir ki, xüsusilə axşam saat 18:00-19:00-dan sonra satış məntəqələrində çörək tapmaq çətinləşir.
Sakinlər ehtimal edirlər ki, vəziyyətə günün ikinci yarısından etibarən Qəbələ və Şəkidən Oğuza gətirilən çörəyin miqdarının azalması səbəb ola bilər. Onların sözlərinə görə, rayonda fəaliyyət göstərən çörək sexləri də yaranmış tələbatı tam qarşılaya bilmir.
Qeyd edək ki, Oğuz rayonunun çörəklə təminatı əsasən yerli çörək sexləri, eləcə də qonşu Qəbələ və Şəki rayonlarından gətirilən məhsullar hesabına həyata keçirilir.
