Xaçmaz rayonunun Niyazoba kəndindən dənizə gedən əsas yolun vəziyyəti sakinlərin narazılığına səbəb olub.
Məsələ ilə bağlı Sahimal.News-a danışan sakinlər bildiriblər ki, yol uzun müddətdir baxımsız qalıb. Sel suları nəticəsində yolun bir hissəsi yuyularaq yararsız hala düşüb. Kənd sakinləri dəfələrlə öz vəsaitləri hesabına buranı bərpa etməyə çalışsalar da, növbəti yağış və sel nəticəsində yol yenidən dağılıb. Bundan əlavə, yolun ətrafı da bərbad vəziyyətdədir. Əraziyə məişət tullantıları, sellofan paketlər, plastik butulkalar və digər zibillər səpələnib ki, bu da antisanitar vəziyyət yaradır.
Sakinlərin sözlərinə görə, aidiyyəti qurumlara dəfələrlə müraciət edilsə də, problem həllini tapmayıb. Onlar qeyd edirlər ki, məsuliyyətin hansı qurumun üzərinə düşdüyü barədə dəqiq məlumat verilmir və müraciətlər nəticəsiz qalır.
Niyazoba sakinləri kəndi dənizlə birləşdirən əsas yolun təcili təmir olunmasını və problemin nəzarətə götürülməsini tələb edirlər.
