Əslən Şabran rayonundan olan tanınmış müğənni Nadir Qafarzadə son günlər müzakirələrə səbəb olan "arvad" sözünün işlədilməsi ilə bağlı fikirlərini açıqlayıb.
Shimal.News məlumat verir ki, ifaçı bu sözə görə gələcəkdə cərimələrin tətbiq ediləcəyi ilə bağlı yayılan iddiaları absurd adlandırıb.
"Arvad-uşağım bağdadır. Gedirəm arvadıma baş çəkim. Kim necə istəyirsə, öz həyat yoldaşına elə müraciət etsin. Bu, şəxsi məsələdir. Köhnə kəndə təzə adət gətirəcəksiniz? "Arvad" deyənlər cərimələnəcək? İşiniz-gücünüz bitib?" – deyə sənətçi bildirib.
Nadir Qafarzadə qeyd edib ki, "ər-arvad" ifadəsi illərdir Azərbaycan dilində və ailə münasibətlərində işlədilir:
"Biz belə eşitmişik: "ər-arvad". Hətta nikahda da deyilir: "Sizi ər-arvad elan edirik". Burada təhqiredici nə var ki? Atamın da, babamın da arvadı olub. Mənim də, övladımın da arvadı var. Həyat yoldaşı da deyirik, ömür-gün yoldaşı da. "Arvad" sözü əslində daha şirindir", – deyə o əlavə edib.
Qeyd edək ki, bir müddət əvvəl Milli Məclisin plenar iclasında deputat Bəhruz Məhərrəmov qanunvericilikdə "arvad" sözünün dəyişdirilməsi ilə bağlı təklif səsləndirmişdi.
