Mollalı kəndinə qədər olan 5 kilometrlik yol uzun illərdir təmir olunmadığı üçün yararsız vəziyyətə düşüb.
Bu barədə Shimal.News-a danışan kənd sakinlərinin sözlərinə görə, kənd Qaraməryəm-İsmayıllı-Şəki magistral yolunun sağ tərəfində, Qəbələ rayonu ilə sərhəddə yerləşir. 160-dan çox fərdi yaşayış evinin olduğu kənddə 700-ə yaxın yerli yaşayır.
Sakinlər bildirirlər ki, onların əsas yola yeganə çıxışı olan kənd yoluna bu vaxta qədər bir dəfə də olsun asfalt örtüyü çəkilməyib. Yağışlı havalarda yol palçıqla örtülür və piyadaların hərəkəti xeyli çətinləşir.
Qeyd olunur ki, məktəbə gedən şagirdlər yararsız yol səbəbindən valideynləri tərəfindən avtomobillə aparılıb-gətirilir. Həmçinin kənddə xəstə olduqda onu əsas yola çıxarmaq ciddi problemə çevrilir.
Sakinlərin sözlərinə görə, kənd yolunun acınacaqlı vəziyyəti ilə bağlı Azərbaycan Avtomobil Yolları Dövlət Agentliyi bir müddət əvvəl təmir işlərinə başlasa da, sonradan naməlum səbəblərdən işlər yarımçıq saxlanılıb.
