Magistratura, rezidentura və doktoranturanı başa vuran zabitlərin hərbi rütbədə olma müddətinin azaldılması təklif olunur.
Shimal.News xəbər verir ki, bu məsələ Milli Məclisin Müdafiə, təhlükəsizlik və korrupsiya ilə mübarizə komitəsinin iclasında müzakirə olunan qanun layihəsində əksini tapıb.
Layihəyə əsasən, Silahlı Qüvvələrin və hərbi xidmət nəzərdə tutulmuş digər dövlət orqanlarının sifarişi əsasında ali təhsil müəssisələrinin magistratura və rezidentura səviyyəsini müvəffəqiyyətlə bitirmiş, həmçinin doktoranturada və ya adyunkturada təhsilini başa vuraraq elmi dərəcə almış zabitlərin hərbi rütbədə olma müddəti hər təhsil səviyyəsi üzrə bir dəfə 1 il azaldılacaq.
Sənəddə "leytenant" hərbi rütbəsində olma müddəti ilə bağlı qaydalara da dəyişiklik təklif edilir.
Hazırda təhsil müddəti 5 il və daha çox olan xüsusi təyinatlı təhsil müəssisələrini bitirən hərbi qulluqçular üçün leytenant rütbəsində xidmət müddəti 1 ildir. Yeni təklifə əsasən, 5 illik təhsil proqramını bitirənlər üçün bu müddət 2 il müəyyən ediləcək.
Aviasiyanın uçuş heyətində və sualtı gəmilərdə xidmət edən hərbi qulluqçular üçün isə leytenant rütbəsində olma müddəti 1 il olaraq qalacaq.
Layihə Milli Məclisdə qəbul ediləcəyi təqdirdə hərbi qulluqçuların rütbələrdə xidmət müddətinin hesablanması ilə bağlı yeni tənzimləmələr tətbiq olunacaq.
