Xaçmaz rayonunda magistral kanalizasiya xəttində yaranan nasazlıq ciddi fəsadlara səbəb olub.
Shimal.News-un məlumatına görə, Quba və Qusar rayonlarından gələn magistral kanalizasiya xətti Xaçmazın Yergüc kəndi ərazisində tutulub. Nəticədə çirkab suları ətrafa daşaraq yaxınlıqdakı təsərrüfat sahələrinə yayılıb.
Eyni zamanda tullantı suları avtobus dayanacağına, ictimai iaşə və ticarət obyektlərinin zirzəmilərinə dolub.
Hadisə yerində yaranmış vəziyyət ərazidə kəskin üfunət qoxusunun yayılmasına səbəb olub və sakinlərin narahatlığına yol açıb. Bildirilir ki, problem artıq bir neçə gündür davam etsə də, hələlik aidiyyəti qurumların əməkdaşları tərəfindən əraziyə müdaxilə olunmayıb.
Sakinlər aidiyyəti qurumları problemi aradan qaldırmağa çağırır.
