Ağdaş və Qəbələ rayonlarının bəzi yaşayış məntəqələrində qaz təchizatı müvəqqəti dayandırılıb.
Shimal.News xəbər verir ki, Zaqatala Regional Qaz İstismar İdarəsinin Ağdaş xidmət sahəsi üzrə Gülənbə, Aşağı Qəsil və Bəylik kəndlərini əhatə edən diametri 89 mm-lik qaz xətti nəqliyyat vasitəsi tərəfindən zədələnib. Qəza nəticəsində yaranmış qaz sızmasının aradan qaldırılması məqsədilə 21 mart saat 01:30-dan etibarən ümumilikdə 352 abonentin qaz təchizatı dayandırılıb.
Bundan başqa, Qəbələ rayonu Vəndam qəsəbəsində P. Həşimov və Rüsyan küçələrində yerləşən qaz tənzimləyicisinin düzgün işləməməsi səbəbindən 21 mart saat 05:00-dan etibarən 512 abonentin qaz təchizatı dayandırılıb.
Qeyd olunub ki, hər iki istiqamətdə aparılan təmir işləri başa çatdıqdan sonra abonentlərin qaz təchizatı bərpa olunacaq.
