Quba rayonunun əsas turistik istiqamətlərindən biri olan Qəçrəş yolunda baş verən torpaq sürüşməsinin fəsadları sürücülər və sakinlər üçün ciddi problem yaratmağa davam edir.
Shimal.News-a danışan sakinlərin sözlərinə görə, hadisədən təxminən iki ay keçsə də, fəsadlar olduğu kimi qalır.
Bildirilir ki, sürüşmə səbəbindən yolun bəzi hissələrində hərəkət çətinləşib, xüsusilə avtomobillərin keçidi zamanı təhlükəli vəziyyət yaranır.
Sakinlər qeyd edirlər ki, iki yolun kəsişdiyi bu ərazidən və gün ərzində həm yerli əhali, həm də bölgəyə gələn turistlər intensiv istifadə edir. Onların fikrincə, mühüm əhəmiyyət daşıyan yolun uzun müddət diqqətsiz qalması narahatlıq doğurur.
Vətəndaşlar aidiyyəti qurumlardan ərazidə təxirəsalınmaz bərpa işlərinin aparılmasını və təhlükəsizlik tədbirlərinin gücləndirilməsini tələb edirlər.
