Azərbaycanın əmək tarixində silinməz iz qoyan simalardan biri də Sevil Qazıyevadır. Zaqatalada dünyaya göz açan gənc qız qısa müddətdə təkcə Azərbaycanın deyil, bütün SSRİ-nin tanıdığı əmək qəhrəmanına çevrilsə də, onun həyatı gözlənilməz faciə ilə yarımçıq qaldı.
1940-cı ildə Zaqatala rayonunda anadan olan Sevil Qazıyeva ilk vaxtlar həkim olmağı arzulayırdı. Lakin ali məktəbə qəbul ola bilmədikdən sonra həyatını tamamilə fərqli sahəyə həsr etdi. Bakıda təhsil aldığı illərdə mexanizator peşəsinə maraq göstərən Sevil sonradan kənd təsərrüfatında çalışan ilk qadınlardan biri kimi adını tarixə yazdırdı.
1950-ci illərin sonu, 1960-cı illərin əvvəllərində kənd təsərrüfatı texnikasının idarə olunması əsasən kişilərin işi hesab olunurdu. Lakin Zaqataladan çıxan gənc qız bu stereotipi dağıtmağa qərar verdi. O, digər rəfiqələri ilə birlikdə pambıqyığan maşınların idarə olunmasını öyrəndi və sonradan yüzlərlə qızın qoşulduğu "Qızlar, sükan arxasına!" təşəbbüsünün simalarından birinə çevrildi.
Təyinatla Mil düzünə göndərilən Sevil Qazıyeva qısa müddətdə rekord göstəriciləri ilə diqqət çəkməyə başladı. Onun əldə etdiyi nəticələr SSRİ rəhbərliyinin də diqqətini çəkdi. Gənc mexanizator müxtəlif ittifaq tədbirlərinə dəvət olunur, çıxışlar edir və əmək uğurları ilə qəzetlərin manşetlərinə çıxırdı.
Bir neçə il ərzində sadə kənd qızından ölkə miqyasında tanınan şəxsə çevrilən Sevil Qazıyeva Azərbaycan Ali Sovetinə deputat seçildi. O dövrdə bu, xüsusilə kənd təsərrüfatı sahəsində çalışan gənc qadın üçün böyük uğur hesab olunurdu.
Lakin şöhrətin zirvəsində olan Sevilin taleyi faciəvi şəkildə dəyişdi.
1963-cü ildə pambıq yığımında istifadə olunan texnikada işləyərkən onun uzun hörükləri maşının hərəkətli hissələrinə dolaşdı. Ağır xəsarətlər alan gənc qadını xilas etmək mümkün olmadı. Cəmi 23 yaşında həyatını itirən Sevil Qazıyevanın ölümü bütün respublikada dərin kədər doğurdu.
Ölümündən sonra ona Sosialist Əməyi Qəhrəmanı adı verildi. Adı məktəblərə, küçələrə və müxtəlif müəssisələrə verildi. Bu gün də Zaqataladan çıxaraq SSRİ miqyasında tanınan və faciəli taleyi ilə yadda qalan Sevil Qazıyeva Azərbaycan tarixində qadınların əmək fəaliyyəti və ictimai həyatda rolunun simvollarından biri hesab olunur.
