Balakəndə kafelərin birində baş verən mübahisə xəsarətlə nəticələnib.
Shimal.News məlumat verir ki, hadisə gecə saatlarında şəhərin Heydər Əliyev prospektində yerləşən ictimai iaşə obyektlərindən birində qeydə alınıb.
Məlumata görə, rayon sakini Paşa spirtli içkinin təsiri altında kafedə səs-küy salaraq ətrafdakıları narahat edib. Bu zaman digər şəxs – Səlim ona yaxınlaşaraq irad bildirib. Xəbərdarlıq tərəflər arasında mübahisəni daha da gərginləşdirib.
Hadisə zamanı Paşa masanın üzərində olan pivə bakalını götürərək Səlimin baş nahiyəsinə zərbə endirib. Nəticədə zərərçəkən ağır xəsarət alıb və ona dərhal tibbi yardım göstərilib.
Faktla bağlı Paşaya Cinayət Məcəlləsinin 221.3-cü maddəsi (silah qismində istifadə olunan əşya ilə xuliqanlıq) ilə ittiham irəli sürülüb. Təqsirləndirilən şəxs ifadəsində hadisəni spirtli içkinin təsiri altında törətdiyini və zərərçəkəni uzun illərdir tanıdığını bildirib:
"Kafedə tək oturub pivə içirdim. Gecə Səlim Flora adlı qadınla ora gəldi və mən onu yanıma çağırdım. Söhbət etdiyimiz vaxt Flora dəfələrlə Səlimi səslədi, sonda isə kabinetə gəlib pərdəni araladı. Bu hərəkətə əsəbiləşərək pivəni onun üzünə atdım. Buna görə də aramızda anlaşılmazlıq oldu. Əsəbiləşərək onu vurdum".
İşə məhkəmədə baxılıb və hökmə əsasən, Paşa 2 il müddətinə azadlıqdan məhrum edilib. Onun cəzasını ümumi rejimli cəzaçəkmə müəssisəsində çəkməsi müəyyən edilib.
