1989-cu il dekabrın 31-də azərbaycanlılar SSRİ–İran sərhədində Şimali və Cənubi Azərbaycanı ayıran sərhəd dirəklərini dağıdıblar. Həmin gün İran ərazisində və Azərbaycan Respublikasında yaşayan azərbaycanlılar Araz çayını keçərək bir-biriləri ilə görüşüblər. Məhz bu tarixi hadisə Dünya Azərbaycanlılarının Həmrəyliyi Gününün əsasını qoyub.
1991-ci il dekabrın 16-da ulu öndər Heydər Əliyevin təşəbbüsü ilə Naxçıvan Muxtar Respublikası Ali Məclisinin iclasında 31 dekabr Dünya Azərbaycanlılarının Həmrəyliyi Günü elan edilib.
Bu əlamətdar gün taleyin hökmü ilə dünyanın müxtəlif ölkələrinə səpələnmiş soydaşlarımızın tarixi Vətən – müstəqil Azərbaycanla əlaqələrinin möhkəmləndirilməsi, həmçinin onların bir-biri ilə sıx ünsiyyət qurması, milli-mənəvi dəyərlərimizin və adət-ənənələrimizin qorunub saxlanılması məqsədilə qeyd olunur.
Bu gün xalqımızın birliyi və həmrəyliyi ölkəmizin inkişafını daha da sürətləndirir. Tariximizə qızıl hərflərlə yazılan Vətən müharibəsində qazanılan Zəfər həmrəyliyimizin, xalq–iqtidar birliyinin və bir yumruq ətrafında birləşməyimizin bariz nümunəsidir. 44 günlük Vətən müharibəsində Ali Baş Komandan İlham Əliyevin rəhbərliyi ilə Müzəffər Azərbaycan Ordusu ədaləti bərpa edib. Bu Qələbə Azərbaycanın beynəlxalq mövqelərinin möhkəmlənməsində və nüfuzunun yüksəlməsində mühüm rol oynayıb.
Shimal.News kollektivi olaraq bütün soydaşlarımızı Dünya Azərbaycanlılarının Həmrəyliyi Günü münasibətilə təbrik edirik. Bu əziz gündə hər birinizə birlik, firavanlıq və yeni ildə uğurlar arzulayırıq!
