Bu gün şəhid Fəqan Məmmədovun doğum günüdür.
Shimal.News xəbər verir ki, Fəqan Vahid oğlu Məmmədov 1998-ci il iyunun 27-də Zaqatala rayonunun Yeni Suvagil kəndində anadan olub.
2004-2015-ci illərdə A.Qədirov adına 2 saylı Yeni Suvagil kənd tam orta məktəbində, 2015-2019-cu illərdə Azərbaycan Dövlət Mədəniyyət və İncəsənət Universitetinin Kinorejissorluq fakültəsində təhsil alıb. Nişanlı olub.
O, 2020-ci ildə müddətli həqiqi hərbi xidmətə çağırılıb. Vətən müharibəsinə qədər Azərbaycan Silahlı Qüvvələrinin "N" saylı hərbi hissəsində xidmət edib.
2020-ci il sentyabrın 27-də başlayan Vətən müharibəsi zamanı Ağdamın azadlığı uğrunda gedən döyüşlərdə iştirak edib.
Fəqan Məmmədov oktyabrın 6-da Ağdam istiqamətində gedən döyüşlər zamanı şəhid olub. Həmin döyüşlərdə Azərbaycan Ordusunun hərbçiləri Ermənistan silahlı qüvvələrinin hərbçilərini mühasirəyə alıblar və qarşı tərəf ağ bayraq qaldırıb. Fəqan Məmmədov onlara yaxınlaşmaq istədikdə isə erməni hərbçilər əl qumbarasından istifadə ediblər. Bu zaman Fəqan Məmmədov özünü sipər edərək döyüş yoldaşlarının həyatını xilas edib.
Fəqan Məmmədov Zaqatala rayonunun Yeni Suvagil kəndində dəfn olunub.
O, ölümündən sonra "Vətən uğrunda" və "Ağdamın azad olunmasına görə medalı" ilə təltif edilib.
