Quba rayonunun Uzunmeşə və Kürkün kəndləri istiqamətində elektrik dirəkləri və naqillərinin vəziyyəti ilə bağlı sakinlər narazılıq edirlər.
Shimal.News-a danışan sakinlərin sözlərinə görə, ərazidə bəzi elektrik dirəkləri qəzalı vəziyyətdədir, naqillərin isə müəyyən hissələrdə həddindən artıq aşağı sallandığı müşahidə olunur. Onlar bildirirlər ki, bəzi dirəklər əlavə olaraq taxta dayaqlardan istifadə edilməklə saxlanılır.
Sakinlərin iddiasına görə, ötən aylarda ərazidə baş verən qısaqapanma nəticəsində bir neçə evdə soyuducu, televizor və digər elektrik cihazları sıradan çıxıb.
"Elektrik dirəklərinin vəziyyəti ürəkaçan deyil. Qısaqapanmalar baş verir və nəticədə evlərdə elektrik cihazları sıradan çıxır. Naqillərin aşağı sallanması, dirəklərin əlavə dayaqlara söykənməsi təhlükə yaradır. Problemin aradan qaldırılmasını istəyirik. Ümid edirik ki, bizim də səsimizi eşidən olacaq", - sakinlər qeyd ediblər.
