Xaçmaz şəhərində yol infrastrukturu ilə bağlı sakinlərin narazılığı artıb.
Shimal.News-a daxil olan məlumata görə, problem şəhərin Hacı Zeynalabdin Tağıyev küçəsində, Kapital Bankla üzbəüz yerləşən iki mərtəbəli çoxmənzilli yaşayış binalarını əhatə edir.
Sakinlərin sözlərinə görə, həmin binalara avtomobillə giriş-çıxış üçün cəmi bir yol mövcuddur. Giriş hissəsində avtomobillərin park edilməsi və yolun dar olması sürücülər üçün ciddi çətinlik yaradır, hərəkətin təhlükəsizliyini azaldır.
Piyadalar isə ərazidə keçidin mövcud olduğunu bildirsələr də, onun birbaşa səkiyə deyil, bordür və ağacların olduğu otlu sahəyə çıxmasının sual doğurduğunu deyirlər. Bundan əlavə, yol nişanlarının rənginin solması səbəbindən xüsusilə yağışlı havalarda görünməməsi piyadalar və sürücülər üçün əlavə risk yaradır.
Sakinlər aidiyyəti qurumlara müraciət edərək, giriş-çıxışın düzgün tənzimlənməsini, yol və nişanlanma ilə bağlı mövcud problemlərin aradan qaldırılmasını xahiş edirlər.
