Xızının Ağdərə kəndinin bəzi sakinləri ərazini tərk edirlər.
Qafqazinfo.az-ın məlumatına görə, buna səbəb infrastruktur çatışmazlığıdır.
Sakinlərin sözlərinə görə, vaxtilə böyük və canlı yaşayış məntəqəsi olan bu kənddə elektrik enerjisi mövcud olsa da, nə internet, nə də hər hansı mobil operatorun şəbəkəsi fəaliyyət göstərir.
Təxminən bir il əvvəl kəndin yaxınlığına mobil anten quraşdırılıb. Lakin bu günə qədər istifadəyə verilməyib. Kənd əhalisi telefonla danışmaq və ya hər hansı əlaqə yaratmaq üçün avtomobillə dağlara qalxmağa məcbur qalır.
"Övladı hərbi xidmətdə olanlar var, telefon danışığı edə bilmirlər. Gərək bunlar özləri dağa çıxanda zəng etsinlər, onda da vaxt düz gəlmir. Problem sadəcə bundan ibarət deyil. Yollarımız, körpülərimiz də bərbad haldadır. Bu kənddə yaşlı sakinlər var, səhhətlərində problem yarananda qalırıq ki, onları xəstəxanaya necə aparaq. Öz hesabımıza dəfələrlə yollarda təmir işləri aparıb, körpüləri düzəltmişik. Amma sonuncu dəfə yağan güclü yağışlar yenidən bütün körpüləri yararsız hala salıb. Dəfələrlə məsələ ilə bağlı müraciətlər etmişik. Lakin heç kim gəlib maraqlanmır, yaxın durmur", - deyə kənd sakini Mehdi Dağlı deyib.
Sakinlər bildirir ki, hazırda kənddə cəmi 20-dən bir qədər çox ev qalıb və son bir ildə təxminən 20 ailə buranı tərk edib. Halbuki kənd hələ də tam boşalmayıb. Burada yaşayan insanlar var və onlar gündəlik həyatlarını davam etdirməyə çalışırlar.
Məsələ ilə bağlı "Aztelekom" MMC bildirib ki, hazırda sözügedən ərazinin relyefinin çətinliyi və təsərrüfat sayının azlığı səbəbindən ərazidə GPON (Giqabit Tutumlu Passiv Optik Şəbəkə) şəbəkəsinin tikintisi həyata keçirilməyib. Lakin sakinlərin istəyi nəzərə alınaraq, "Aztelekom" MMC tərəfindən sözügedən ərazidə "FWA" (sabit simsiz internet bağlantısı) və digər genişzolaqlı texnologiyaların tətbiqi nəzərdə tutulur.
Kənd yollarındakı problemlərlə bağlı Xızı rayon İcra Hakimiyyəti ilə əlaqə saxlamağa cəhd edilsə də, telefon zənglərinə cavab verən olmayıb.
