Zaqatalada yağan leysan yağışlarının yaratdığı sel nəticəsində əmələ gələn içməli su problemi aradan qaldırılır.
Shimal.News xəbər verir ki, sel zamanı Talaçay (Meşleş) su mənbəyində lil və çoxsaylı yad cisimlərin magistral su xəttini tutması səbəbindən şəhərin su təchizatında çətinlik yaranmışdı.
Zaqatala su meliorasiya sistemlərinin istismarı idarəsinin məlumatına görə, cəlb olunan ağır texnika və işçi qüvvəsinin səyləri nəticəsində magistral su xətti tam təmizlənərək açılıb.
Hazırda hər iki su mənbəyindən yenidən su qəbulu həyata keçirilir. Bildirilib ki, bu gün – 15 iyul tarixində axşam saatlarından etibarən Zaqatala şəhəri və şəhərətrafı ərazilərin tam şəkildə içməli su ilə təmin olunması nəzərdə tutulur.
