Gecə mağazaya gedən Quba sakini yol kənarında eşitdiyi küçük zingiltisinə biganə qalmayıb və onu dərin kanaldan xilas edib.
Shimal.News-un əldəetdiyi məlumata görə, həmin şəxs bağların kənarı ilə hərəkət edərkən yolboyu davam edən it səsi eşidib. Telefonunun işığından istifadə edərək səsin gəldiyi yerə yaxınlaşanda küçüyün təsərrüfat suyu olan dərin kanala düşdüyünü və oradan çıxa bilmədiyini görüb.
O, evə qayıdaraq bel gətirib. Kanala enmək üçün ətrafdakı daş və taxta parçalarından özünə dayaq düzəldən sakin daha sonra küçüyü xilas etmək üçün kanala düşüb.
Əvvəlcə belin köməyi ilə küçüyü qarşı tərəfdən öz tərəfinə keçirib, daha sonra əli ilə tutaraq kanaldan çıxarıb.
"Orada qalsaydı, məni vicdan boğardı, gecə gözümə yuxu gətməzdi", – deyə sakin bildirib.
Kiçik görünən, amma böyük məna daşıyan bu addım bir canlının həyatını xilas etməklə yanaşı, insanın mərhəmət və məsuliyyət hissinin də gözəl nümunəsidir.
