Quba rayonunda fəaliyyət göstərən "Bilim Quba" mərkəzinin fəaliyyətə başlamasının 1 ili tamam olur.
2026-cı il mayın 14-də bir yaşını qeyd edən mərkəz ASAN xidmətin İnnovasiyalar Mərkəzinin "Bilim Azərbaycan" layihəsi çərçivəsində fəaliyyət göstərir.
Quba ASAN Həyat kompleksində yerləşən mərkəzdə təbiət elmləri, riyaziyyat, astronomiya-kosmos-aviasiya və dizayn laboratoriyaları fəaliyyət göstərir. Hər laboratoriyada eyni vaxtda 20 nəfər olmaqla ümumilikdə 80 şagird təlimlərdə iştirak edə bilir.
Ötən bir il ərzində mərkəzdə keçirilən müxtəlif tədbirlərdə fərdi şəkildə 3000-ə yaxın uşaq, məktəblər vasitəsilə isə 2000-dən çox şagird iştirak edib. Bundan əlavə, 20-dən artıq layihəyə 6000-ə yaxın şagird və valideyn qoşulub.
Beləliklə, ümumilikdə "Bilim Quba"nın fəaliyyətlərindən yararlananların sayı 11 min 300 nəfəri ötüb.
Mərkəzdə gələcəyin tələblərinə uyğun layihə əsaslı və problem yönümlü təhsil yanaşmasını tətbiq edən "Deneyap" texnologiya proqramı da həyata keçirilir. 2025-ci ilin aprel ayında Qubada keçirilən seçim imtahanında 1000 şagird arasından seçilən 80 nəfər bu proqramda iştirak hüququ qazanıb.
Təlimlər çərçivəsində şagirdlər 11 müxtəlif istiqamət üzrə texnologiya və innovasiya əsaslı layihələr hazırlayırlar.
Qeyd edək ki, "Bilim Azərbaycan" layihəsi 2021-ci ilin 23 sentyabrında Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə Türkiyə Texnologiya Komandası Fondu arasında imzalanmış Anlaşma Protokolu əsasında həyata keçirilir.
Layihənin əsas məqsədi 6-14 yaş arası uşaqlarda elm, texnologiya, sahibkarlıq və innovasiya sahələrinə marağın artırılması, onların XXI əsrin tələblərinə uyğun bilik və bacarıqlarla təmin olunmasıdır.
"Bilim Azərbaycan" layihəsinin ilk nümunəsi olan Bilim Bakı mərkəzi 2022-ci ilin 28 mayında İlham Əliyev, Rəcəb Tayyib Ərdoğan və Əziz Sancarın iştirakı ilə istifadəyə verilib.
