Balakən rayonundan olan Vətən müharibəsi şəhidi Elməddin Şindiyevin xatirəsi ehtiramla yad edilir.
Shimal.News məlumat verir ki, Elməddin 6 mart 1995-ci ildə Balakən rayonunun Talalar kəndində anadan olub. O, 2001–2012-ci illərdə kənddə yerləşən 2 saylı tam orta məktəbdə təhsil alıb.
2013-cü ildə müddətli həqiqi hərbi xidmətə çağırılan Elməddin Şindiyev 2013–2014-cü illərdə Naxçıvan Muxtar Respublikasında yerləşən hərbi hissələrdən birində xidmət edib. Daha sonra isə Azərbaycan Silahlı Qüvvələrində müddətdən artıq həqiqi hərbi xidmət hərbi qulluqçusu kimi fəaliyyətini davam etdirib.
Azərbaycan Ordusunun əsgəri olan Elməddin Şindiyev 2020-ci il sentyabrın 27-də başlayan İkinci Qarabağ müharibəsi zamanı döyüşlərə qatılıb. O, xüsusilə Suqovuşan istiqamətində gedən döyüşlərdə iştirak edib və oktyabrın 10-da həmin ərazidə gedən ağır döyüşlər zamanı qəhrəmancasına şəhid olub.
Şəhid Elməddin Şindiyev doğulduğu Balakən rayonunda yerləşən Şəhidlər Xiyabanında torpağa tapşırılıb.
Qeyd edək ki, Azərbaycanın ərazi bütövlüyünün təmin edilməsi uğrunda döyüş əməliyyatlarında göstərdiyi igidliyə görə Prezident İlham Əliyevin müvafiq sərəncamları ilə Elməddin Şindiyev ölümündən sonra "Vətən uğrunda" və "Suqovuşanın azad olunmasına görə" medalları ilə təltif edilib.
