Balakən rayonunda kənd yollarının bərbad vəziyyəti ciddi narazılıq yaradır. Xüsusilə Qullar–Gərəkli–Poşbinə–Mazımçay–Mahamalar–Qasbinə kəndlərini birləşdirən yollar uzun illərdir yararsız haldadır.
Sakinlərin bildirdiyinə görə, 10 yaşayış məntəqəsini əhatə edən, 53 kilometrə yaxın kəndarası yollar yağış və qarlı havalarda keçilməz vəziyyətə düşür. Nəticədə nəqliyyat sıradan çıxır, insanlar gündəlik işlərinə çatmaqda çətinlik çəkir. Poşbinə kəndində müəllim işləyən Sahilə Eminova bəzi günlər magistral yoldan kəndə qədər 5 kilometrlik məsafəni piyada getməyə məcbur qaldığını deyir.
Rəsmi məlumatlara görə, Balakən rayonunda dövlət tabeliyində olan yolların 53 faizi yararsız vəziyyətdədir. Buna baxmayaraq, problemin illərdir həllini tapmaması suallar doğurur.
Bizim.Media-nın məlumatına görə, 15 saylı Balakən Yol İstismar İdarəsi bildirib ki, sözügedən yol layihəsi Dövlət İnvestisiya Proqramına salınıb, lakin hələlik yalnız layihə-smeta mərhələsindədir. Sakinlər isə illərdir "gözləyin" cavabı ilə üz-üzə qaldıqlarını deyirlər.
