Balakən şəhəri və ətraf kəndlərinin içməli su təminatı bərpa olunub.
Shimal.News-a bu barədə Azərbaycan Dövlət Su Ehtiyatları Agentliyinin (ADSEA) tabeliyində fəaliyyət göstərən Balakən Su Meliorasiya Sistemlərinin İstismarı İdarəsindən məlumat verilib.
Bildirilib ki, iyulun 7-8-də rayona yağan güclü leysan yağışları nəticəsində yaranan sel magistral su xəttini lil və müxtəlif yad cisimlərlə tutaraq yararsız vəziyyətə salmış, bu səbəbdən içməli suyun verilişində məhdudiyyət yaranmışdı.
İdarənin cəlb etdiyi ağır texnika və işçi qüvvəsinin səyi nəticəsində şəhərə gələn əsas magistral su xətti bərpa olunub. Hazırda Balakən şəhəri və ətraf kəndlərin təxminən 90 faizi içməli su ilə təmin edilir.
Qalan 10 faiz ərazinin isə ikinci magistral xəttin bərpasından sonra, yaxın iki gün ərzində su ilə təmin olunacağı bildirilib.
Qeyd olunub ki, son 10 gün ərzində əhalinin suya olan tələbatını ödəmək məqsədilə ADSEA tərəfindən ayrılmış 8 su maşını vasitəsilə Balakən şəhərinə içməli su daşınıb.
Xatırladaq ki, Balakən şəhərinin əsas içməli su mənbəyi Böyük Qafqaz sıra dağlarının ətəyində, şəhərdən təxminən 8 kilometr məsafədə yerləşir.
