Qubada internet problemi ilə bağlı sakinlərin şikayəti bu dəfə bir qədər fərqli "izahlarla" müşayiət olunub. Sakin iddia edir ki, internet xəttində yaranan nasazlığın səbəbi əvvəlcə ağacdələn, daha sonra isə sincab kimi göstərilib.
Sakin bildirib ki, həftəsonları Qubaya gəlir və internetdən istifadə etmək istəyərkən dəfələrlə eyni problemlə qarşılaşır. Onun sözlərinə görə, 170 qaynar xəttinə üç dəfədən çox müraciət edilib.
Sakin deyir ki, əməkdaşlar hər dəfə əraziyə gəlib nasazlığı aradan qaldırsalar da, internet qısa müddət sonra yenidən kəsilib.
Onun sözlərinə görə, ilk baxış zamanı kabellərin naməlum canlı tərəfindən zədələndiyi bildirilib:
"Bəlkə də ağacdələndir, nə bilək", – deyə sakin əməkdaşların ona bildirdiyini söyləyib.
Daha sonra isə başqa ehtimal irəli sürülüb:
"Buralarda iti dişli sincablar olur. Kabellərdə polad var deyə, dişlərini onunla itiləyirlər".
Sakin məsələyə yumorla yanaşaraq bildirir ki, artıq internet problemini həll etməkdən çox, Quba meşələrində hansı heyvanın kabel "yeməsi" ilə maraqlanmağa başlayıb.
Sonuncu müraciət zamanı isə Quba şöbəsinin əməkdaşının modemə gedən kabeli dəyişdirdiyi bildirilir. Bundan sonra internetin bərpa olunduğu deyilsə də, sakin bunun da uzun çəkmədiyini və xəttin yenidən kəsildiyini söyləyir.
Hazırda 170 qaynar xəttindən sakinlərə növbəti dəfə əməkdaş göndəriləcəyi bildirilib.
Sakin isə vəziyyəti belə ifadə edir:
"Biz sizdən internet istəyirik, meşə təsərrüfatı hesabatı yox. Ağacdələnin səsini tanıyırıq, sincabın diş quruluşunu müzakirə edirik".
Mənbə: Konkret.az
