Yevlax–Zaqatala–Gürcüstan dövlət sərhədi magistral yolunun bir hissəsinin uzun illərdir əsaslı təmir olunmaması bölgə sakinlərinin narazılığına səbəb olub.
Shimal.News-a danışan sürücülərin sözlərinə görə, 1960-cı illərdə inşa edilən yolun istismar müddəti çoxdan başa çatıb. Onlar bildirirlər ki, son 10-15 ildə yolun vəziyyəti daha da pisləşib. Xüsusilə Şəkidən Zaqatalaya qədər olan hissə. Hazırda marşrut boyunca irili-xırdalı çoxsaylı çalalar yaranıb.
Sakinlər qeyd edirlər ki, yol örtüyündəki nahamarlıqlar nəqliyyatın hərəkətini çətinləşdirir, bəzi hallarda isə qəza şəraiti yaradır. Onların sözlərinə görə, magistral yol üzərində yerləşən körpülərin əksəriyyəti də istismar müddətini çoxdan başa vurub.
Hər gün bu yoldan istifadə edən Şəki, Qax və Zaqatala rayonlarının sakinləri bildirirlər ki, təmirsiz hissə həm vaxt itkisinə səbəb olur, həm də avtomobillərin tez-tez sıradan çıxmasına gətirib çıxarır.
Qeyd edək ki, Yevlax–Zaqatala–Gürcüstan dövlət sərhədi magistral yolunun ümumi uzunluğu 164 kilometrdir. Yolun 46 kilometrlik Xaldan–Şəki və 40 kilometrlik Zaqatala–Balakən–Mazımçay hissələri yenidən qurulsa da, qalan hissələrdə əsaslı təmir işləri hələ də aparılmayıb.
