Xalq artisti Alim Qasımov müğənni Üzeyir Mehdizadə ilə ifa etdiyi "Nəyindən narahatsan" mahnısına münasibət bildirib.
Shimal.News xəbər verir ki, Alim Qasımov müsahibəsində mahnının sözlərini və musiqisini bəyəndiyini deyib.
"Üzeyir Mehdizadə bir mahnı var, musiqisini yazanda səni düşünmüşəm dedi. Əsas da mahnının sözləri ürəyimə yatdı", – deyə Xalq artisti bildirib.
Qasımov duetə göstərilən marağın və tənqidlərin gözlənilməz olmadığını söyləyib:
"Üzeyirlə duetimizin belə qarşılanacağını təxmin edirdim, amma bu qədər olacağını gözləmirdim. Ancaq bu da bir yenilikdir. Kim tənqid edir, özü bilər".
Xalq artisti son dövrlərdə televiziya proqramlarında əvvəlki qədər görünməməsinin səbəblərindən də danışıb. O, musiqiçilərin əməyinin layiqincə qiymətləndirilməsinin vacibliyini vurğulayıb.
"Televiziya ona bir kartof qədər də qiymət qoymursa, niyə gedib orada çıxış etsin?" – Alim Qasımov deyib.
O, rep ifaçısı ilə birgə hazırladığı layihəyə gələn tənqidlərə də münasibət bildirib və bunu musiqidə normal proses kimi qiymətləndirib.
"Normal şeydir, musiqidir də", – deyə Qasımov qeyd edib.
Xalq artisti gələcəkdə də fərqli janrlarda əməkdaşlıqlara açıq olduğunu bildirib:
"Yaxşı musiqidirsə, yaxşı təklifdirsə, ürəyimə yatırsa, mənə elə gəlir ki, tamaşaçının da ürəyinə yatacaq".
Alim Qasımov yeni layihələr və öz ideyalarının da olduğunu, lakin hələlik onlar barədə danışmaq istəmədiyini söyləyib.
Mənbə: Kulis.аz
