Quba rayonunun Alekseyevka kəndində yerləşən 17 nömrəli uşaq bağçasının qarşısındakı yararsız yol problemi aradan qaldırılıb.
Xatırladaq ki, bir müddət əvvəl Shimal.News tərəfindən gündəmə gətirilən problemdə sakinlər və valideynlər yolun bərbad vəziyyətdə olduğunu bildirmişdilər. Onların sözlərinə görə, ərazi uzun müddət baxımsız qaldığı üçün xüsusilə yağışlı havalarda bağçaya gediş-gəliş çətinləşirdi. Yolun iri çalalar və gölməçələrlə dolu olması həm piyadalar, həm də avtomobillər üçün ciddi problem yaradırdı.
Məsələ ictimailəşdirildikdən sonra ərazidə təmir-bərpa işlərinə başlanılıb. Yolun problemli hissələri hamarlanıb, çuxurlar doldurulub və hərəkətin təhlükəsizliyi təmin edilib.
Sakinlər görülən işləri müsbət qiymətləndirərək problemin həllinə göstərilən diqqətə görə razılıqlarını ifadə ediblər.
