Xaçmaz rayonunun Çiləgir kəndinin sakinləri artıq 9 aya yaxındır ki, elektrik enerjisinin həddindən artıq aşağı gərginliklə verildiyini bildirərək aidiyyəti qurumlardan kömək istəyirlər.
Məsələ ilə bağlı Shimal.News-a danışan sakinlərin sözlərinə görə, kənddə elektrik şəbəkəsində gərginlik əksər vaxtlarda cəmi 90-100 volt arası olur. Bu səbəbdən evlərdə istifadə olunan məişət avadanlıqları ya ümumiyyətlə işləmir, ya da sıradan çıxır.
Onların iddiasına əsasən, aşağı gərginlik nəticəsində su nasosları, paltaryuyan maşınlar, soyuducular, fen, tozsoran və digər elektrik avadanlıqları yararsız vəziyyətə düşüb. Soyuducular işləmədiyi üçün ərzaqlar xarab olur, buzluqlar əriyir, ət və digər qida məhsulları istifadəyə yararsız hala gəlir.
Sakinlər bildirirlər ki, hamamlarda su qızdırıcıları da işləmədiyindən gündəlik məişət problemləri daha da dərinləşib. Onların sözlərinə görə, bəzi ailələr elektrik çatışmazlığı səbəbindən məcbur qalaraq generatorlardan istifadə edir və bunun üçün hər gün əlavə yanacaq xərci çəkirlər.
Şikayətçilər deyirlər ki, kənddə təxminən 100-150 ev eyni problemlə üz-üzədir.
Sakinlərin sözlərinə görə, son 9 ay ərzində aidiyyəti qurumlara dəfələrlə yazılı və şifahi müraciətlər edilib. Hətta kənd sakinləri birlikdə məsələ ilə bağlı müxtəlif qurumların qəbulunda olublar, "Qaynar xətt"ə dəfələrlə zəng edilib, kollektiv ərizələr göndərilib və yüzə yaxın sakinin imzası toplanaraq təqdim olunub.
Onlar iddia edirlər ki, müraciətlərdən sonra əraziyə bir neçə dəfə əməkdaşlar gəlsə də, problem aradan qaldırılmayıb. Əksinə, sakinlərin sözlərinə görə, vəziyyət daha da ağırlaşıb.
"İşıq bəzən 100 volta çatanda sevinirik. Evdə üç lampadan biri zəif işləyir, digərləri isə artıq sıradan çıxıb. Bu vəziyyətdə nə normal məişət həyatımız var, nə də istifadə etdiyimiz avadanlıqları qoruya bilirik", - deyə sakinlər bildirirlər.
Onlar aidiyyəti qurumlardan problemin qısa müddətdə araşdırılmasını və kənddə normal elektrik təminatının bərpa olunmasını tələb edirlər.
