Şabran rayonunun Gəndov kəndində yolların, xüsusilə də məktəbə gedən yolun bərbad vəziyyətdə olması sakinlərin narazılığına səbəb olub.
Məsələ ilə bağlı Shimal.News-a danışan yerli sakinlərin sözlərinə görə, asfalt örtüyü artıq tamamilə dağılıb və yolda iri çalalar əmələ gəlib.
Yağışlı günlərdə həmin çuxurlara su yığılır, bu isə həm piyadaların, həm də nəqliyyat vasitələrinin hərəkətini çətinləşdirir.
“Uşaqlar hər gün bu yolla məktəbə gedib-gəlirlər. Yağış yağanda yol gölə çevrilir, keçmək mümkün olmur. Valideynlər də, müəllimlər də bu vəziyyətdən əziyyət çəkirlər. Artıq illərdir vəd verilir ki, yol təmir olunacaq, amma heç bir iş görülmür”, - deyə sakinlər bildiriblər.
Eyni zamanda, kəndin marşrut dayanacağı ətrafında müəyyən hissələrə daş döşənib, lakin ümumi yolun əsas hissəsi baxımsız vəziyyətdə qalır.
Sakinlər aidiyyəti qurumlardan Gəndov kənd yolunun təcili şəkildə təmir olunmasını istəyirlər.
