Qusar rayon sakini ev tikintisi vədi ilə 29 min manat pulunun mənimsənildiyini iddia edir.
Baku TV-nin məlumatına görə, zərərçəkən Xırdalanda ev tikdirmək məqsədilə tanışı vasitəsilə İrşad adlı şəxslə əlaqə yaradıb və mərhələli şəkildə ümumilikdə 29 min manat ödəyib. İddiasına əsasən, tikinti işlərinin 40 gün ərzində başa çatdırılması vəd edilsə də, bir ildən artıq vaxt keçməsinə baxmayaraq nə ev tikilib, nə də ödənilən vəsait geri qaytarılıb.
Onun sözlərinə görə, pulun bir hissəsi Aqil adlı şəxsin iştirakı ilə verilib və həmin şəxsin də prosesdən məlumatlı olduğunu düşünür. Lakin adı hallanan Aqil ittihamları qəbul etməyib.
Məsələ ilə bağlı hüquq-mühafizə orqanlarında araşdırma aparılıb. Bildirilir ki, ev tikmək vədi ilə vətəndaşın pulunu ələ keçirməkdə şübhəli bilinən İrşad Məmmədov barəsində Azərbaycan Respublikası Cinayət Məcəlləsinin müvafiq maddəsi ilə cinayət işi başlanılıb.
İstintaq zamanı onun ölkəni tərk etdiyi müəyyən edilib və barəsində axtarış elan olunub. Hazırda cinayət işi üzrə araşdırmalar davam etdirilir.
