Qəbələ rayonunun Solquca və Dandıx kəndlərinin sakinləri yolların yararsız vəziyyətdə olmasından və Qaraçay çayı üzərində körpünün olmamasından narazıdırlar.
Sakinlərin Shimal.News-a verdiyi məlumata görə, kəndə gedən yolun bəzi hissələri çayın içərisindən keçir. Yağışlı havalarda və çayda suyun səviyyəsi artdıqda hərəkət daha da təhlükəli olur.
Sakinlər bildirirlər ki, illərdir Qaraçay üzərində körpünün tikilməsini gözləyirlər. Onların sözlərinə görə, körpünün olmaması nəqliyyatın hərəkətini çətinləşdirir, təcili yardım, məktəb və digər vacib xidmətlərə çıxışda problemlər yaradır.
"Bu neçəinci əsrdir ki, belə vəziyyətdə yaşayırıq. Körpümüz yoxdur, yollardan istifadə etmək əziyyətə çevrilib", - deyə kənd sakinləri qeyd ediblər.
Onlar aidiyyəti qurumlardan problemin həlli üçün tədbir görülməsini və Qaraçay çayı üzərində körpünün inşa edilməsini tələb edirlər.
