Bu gün şəhid Əmirağa Ağayevin doğum günüdür.
Əmirağa Mahir oğlu Ağayev 29 may 2002-ci ildə Şabran rayonunun Surra kəndində dünyaya göz açıb. Orta məktəbi bitirdikdən sonra 2020-ci ilin iyul ayında hərbi xidmətə yollanıb.
Azərbaycan Ordusunun əsgəri olan Əmirağa Ağayev 2020-ci il sentyabrın 27-də başlayan Vətən müharibəsində iştirak edib. O, Xocavənd və Füzulinin azadlığı uğrunda gedən döyüşlərdə vuruşub. Ailəsi ilə sonuncu dəfə 11 oktyabr tarixində əlaqə saxlayan Əmirağa Füzuli istiqamətində döyüş tapşırığını yerinə yetirərkən şəhid olub. Uzun müddət itkin kimi axtarılan Əmirağa Ağayevin nəşi 10 fevral 2021-ci ildə tapılıb və 11 fevral tarixində Şabran Şəhidlər xiyabanında dəfn olunub.
Əmirağa Ağayev ölümündən sonra "Vətən uğrunda", "Xocavəndin azad olunmasına görə" və "Füzulinin azad olunmasına görə" medalları ilə təltif edilib.
