Xaçmaz rayonunun Xudat şəhərində yerləşən 126 illik tarixə malik dəmiryol stansiyasının ərazisində baxımsızlıq və antisanitar vəziyyət hökm sürür.
Shimal.News-a daxil olan şikayətə görə, stansiyanın sanitar qovşağı yararsız vəziyyətdədir. İnzibati binanın divarları və pəncərələri uzun müddətdir təmir olunmayıb. Ərazidə məişət tullantıları da qalaqlanıb.
Stansiyada iki sanitar qovşaq mövcuddur. Onlardan birinə natəmizlik və üfunət qoxusu səbəbindən daxil olmaq mümkün deyil. Digər sanitar qovşağın girişi isə taxta parçaları ilə bağlanılıb.
Məsələ ilə bağlı Azərbaycan Dəmir Yolları QSC-nin (ADY) mətbuat xidmətinə sorğu ünvanlanıb.
Qurumdan bildirilib ki, Xudat stansiyası sərnişinlərin istifadəsi üçün açıq deyil. Digər nöqsanlarla bağlı görüntülərin də quruma təqdim olunması xahiş edilib və məsələnin araşdırılacağı bildirilib.
Qeyd edək ki, Xudat Dəmiryol Stansiyası 1900-cü ildə inşa edilib. Stansiya vaxtilə Biləcəri-Dərbənd dəmir yolu marşrutunun tərkib hissəsi olub.
1920-ci ildə Xudat stansiyası ərazisində Azərbaycan Xalq Cümhuriyyəti ordusu ilə XI Qızıl Ordu arasında şiddətli döyüş baş verib.
