Şabran rayonunun Fətəli xan Xoyski küçəsində infrastruktur ilə bağlı narazılıq yaşanır.
Yerli sakinlərin Shimal.News-a verdiyi məlumata görə, yolun bərbad vəziyyəti gündəlik həyatı iflic edir və insan təhlükəsizliyi üçün real təhlükə yaradıb.
Məlumata əsasən, yol örtüyünün yararsız olması ilə yanaşı, küçədən ağır tonnajlı yük avtomobillərinin mütəmadi hərəkəti vəziyyəti daha da ağırlaşdırır. Piyadalar yol kənarında təhlükə altında hərəkət etməyə məcbur qalır, istənilən an bədbəxt hadisənin baş vermə ehtimalı artır.
Sakinlər bildirirlər ki, yağışlı havalarda yol bataqlığa çevrilir, yay aylarında isə piyadalar göyə qalxan tozu udmanlı olurlar.
Məsələ ilə bağlı dəfələrlə aidiyyəti qurumlara müraciət edildiyi qeyd olunur. Lakin indiyədək nə əsaslı baxış keçirilib, nə də problemin həlli istiqamətində real addım atılıb.
Hazırkı vəziyyətlə bağlı əsas sual açıq qalır: Fətəli xan Xoyski küçəsində yol problemi niyə hələ də həllini tapmır?
Sakinlər ümid edirlər ki, məsul qurumlar bu vəziyyətə biganə qalmayacaq və mümkün faciə baş vermədən əvvəl küçədə təhlükəsizliyin təmin olunması üçün zəruri tədbirlər görüləcək. Onlar xüsusilə yük maşınlarının bu küçədən istifadəsinin məhdudlaşdırılmasını və yolun təmir olunmasını tələb edirlər.
