Bu gün şəhid Orxan Daşdəmirovun doğum günüdür.
Orxan Rafael oğlu Daşdəmirov 27 fevral 2001-ci ildə Xaçmaz rayonunun Hülövlü kəndində anadan olub. O, 2019-cu ildə Cəlilabad rayonunda yerləşən N saylı hərbi hissədə xidmətə başlayıb.
2020-ci il sentyabrın 27-də Vətən müharibəsi başlayan zaman Orxan Daşdəmirov döyüşlərə qatılıb. O, Murovdağ istiqamətində gedən ağır döyüşlərdə şücaətlə vuruşaraq sentyabrın 28-də şəhid olub.
Şəhidin atası Rafael Daşdəmirov Orxanla sonuncu dəfə sentyabrın 23-də əlaqə saxladıqlarını deyir:
"Orxanın müharibədə iştirak etməsindən xəbərimiz olmayıb. Sentyabrın 28-də axşam saatlarında onun şəhid olması xəbərini öyrəndik. Orxan mənim həm tək oğlum, həm də dayağım idi. Onun yoxluğuna alışmaq nə qədər çətin olsa da, Orxanın Vətən torpaqlarının düşməndən azad edilməsi uğrunda şəhidliyə ucalması yeganə təsəllimizdir. Allah bütün şəhidlərimizə rəhmət eləsin".
Orxan Daşdəmirov sentyabrın 30-da doğulduğu Hülövlü kəndində dəfn edilib.
O, ölümündən sonra "Rəşadət" ordeni, "İgidliyə görə", "Vətən uğrunda", "Kəlbəcərin azad olunmasına görə" və "Vətən müharibəsi iştirakçısı" medalları ilə təltif edilib.
