Xaçmaz rayonunun ən yaşlı sakini 113 yaşlı Qızpəri Hacı qızı Əmrahovadır.
Modern.az-ın məlumatına görə, o, 1912-ci ildə rayonun Nağıoba kəndində dünyaya göz açıb, 6 övladı - 3 qızı 3 oğlu var. Qızpəri xanım eyni zamanda 16 nəvə və 32 nəticə nənəsidir. Maraqlı nüans isə ondan ibarətdir ki, Qızpəri nənənin hazırda kötükcəsi yoxdur.
Qızpəri Əmrahovanın həyat yoldaşı Əmrah Balası oğlu Əmrahov da 1912-ci ildə Nağıoba kəndində doğulub. 2001-ci ildə isə vəfat edib.
Doğmalarının sözlərinə görə, Qızpəri Əmrahovanın uzun ömür sürməsində kənd həyatı, fiziki fəallıq və təbii qidalanma mühüm rol oynayıb.
113 yaşını adlamış qadının bu gün də sağlamlığı və uzun ömrə sahib olması Xaçmazın uzunömürlülük ənənəsinin əyani nümunələrindən biri kimi diqqət çəkir.
Qeyd edək ki, hazırda Xaçmaz rayonunda yaşı 100-dən yuxarı 2 sakin yaşayır. Onların hər ikisi qadındır.
